غسالة السمعة الفول أوتوماتيك

هل تعلم ان مادة اعلامية واحده لمدة خمس دقائق على قناة شهيرة قد تكون سببا قويا جدا لمحو سمعة سيئة ظلت تلاحقك منذ ظهورك اعلاميا, وبداية لصفحة جديده غالبا ستكون اقل سوءا , لماذا ؟ لانك اصبحت اكثر شهرة واكثر جماهيرية الان , بالاضافة الى انك اصبحت اكثر خبره اعلاميا وتعلمت كيف تتحدث بحنكة اكثر من ماضيك المتسخ بحيث تبدو انسانا محترما برغم كل ما تفعله .
فى الوسط الفنى الامثلة اكثر من ان تحصى , طبعا تتذكر اغنية " اخصمك اه " واللى غسلت بالبوم " شخابيط " بتاع الاطفال لنفس الفنانة , عمرو دياب ايضا غسل - ونشر ايضا - السنة اللى قبل اللى فاتت فى رمضان عندما غنى دعاء " يانور على نور " وهشام عباس بدعاء الاسماء الحسنى غسل هو الاخر ومحمد منير وشيرين وغيرهم كتييييير من الفنانين اللى بيعملوا اغنيه دينية بين كل فترة وفترة ( يمكن عشان تجديد الايمان ؟ ) , كلهم " يغسلون " جميعا
اما الان فتجرى عملية غسل جماعى بمسحوق محترم جدا عالى الرغوة من ابو علبة بلاستيك على قناة المصرية الفضائية الفول اوتوماتيك للعديد من الفنانين جمله واحده خلال شهر رمضان كل يوم بعد الافطار , طبعا انا لست معترضا على ان يظهر فنان ما على الشاشة ويردد بعض الادعية الدينية - ده حقه - لكن لا افهم ابدا ما السبب ؟ وما الهدف ؟ واشمعنا ف رمضان ؟ طيب منتا خاربها طول السنة ياجدع .
طبعا لا تندهش لامتلاء الوسط الفنى بكل هذا المسحوق والغسيل اليومى على ودنو , ده شئ طبيعى جدا ومظهر صحى زيه زى الغسيل الاسبوعى لهدوم الشغل المتسخة وملايات السرير . لكن الامر لم يعد قاصرا على الوسط الفنى , الجميع الان يريد ان يدخل الغسالة فى اقرب وقت ويخرج منها انضف من يسرا بعد ادعية الفضائية المصريه , او بمعنى اخر انضف من الصينى بعد غسيله
برنامج اخر شاهدته بالامس لاول مرة اسمه " دقو المزاهر " بتاع " احمد عز " بيقدم كل يوم شقة تمليك لعروسين , طبعا ده شئ جميل جدا من حيث المبدأ , انما لو انتبهت سعادتك هاتلاقيه مجرد غسيل سمعه سيئة جدا بتتسبب فى عنوسة شباب مصر كلهم , ومفيش داعى اتكلم فى السياسة عشان انا صايم .
من حقك ان تغسل سمعتك , بل بالعكس اقول لك : من فضلك اغسل سمعتك جيدا بالماء والصابون كل يوم . لكن بلاش - وحياة والدك - تستخدم المسحوق العادى وجرب مرة واحدة تستخدم المسحوق الـ " فول " اتوماتيك , بمعنى انك فعلا تنضف كليا وعلطول مش يوم واحد او شهر واحد . وطبعا الكلام ده ليا انا شخصيا قبل ما يكون لأى حد تانى لانى محتاج لوحدى شوال اريال من الحجم العائلى , وربنا يهدينا جميعا وكل عام وأنتم بخير .